Rishton maktablarida proforientatsiya
Zamonaviy ta’lim jarayonida o‘quvchilarning qiziqishlari, qobiliyatlari va mehnat bozoridagi ehtiyojlarni inobatga olgan holda kasbga yo‘naltirish — proforientatsiya ishlarini olib borish muhim o‘rin tutadi. Bu jarayon o‘quvchilarga kelajakda o‘z yo‘lini to‘g‘ri tanlash, kasbga ongli ravishda qaror berish hamda jamiyatga foydali mutaxassis bo‘lib yetishishlariga yordam beradi. Shu munosabat bilan Rishton maktablarida kasbga yo‘naltirish uchrashuvlari o‘tkazildi. Uchrashuv davomida “Turizm” kafedra mudiri Chori Xusanov universitet faoliyati, ta’lim yo‘nalishlari, talabalarga yaratilgan sharoitlar, xorijiy tillarni o‘rganish imkoniyatlari hamda universitetning xalqaro hamkorlik aloqalari haqida batafsil ma’lumot berdi.
Shuningdek, universitetning Yoshlar ittifoqi koordinatori, Yoshlar Parlamenti a’zosi Shavkat Abdug‘afforov, fakultet koordinatorlari Salohiddin Suyunov, Sevarbek Elboyev va Shukurullo Xusanovlar so‘zga chiqib, TDSHUda talabalar ishtirokida amalga oshirilayotgan ma’naviy-ma’rifiy tadbirlar, festivallar, tanlovlar va ijtimoiy loyihalar, shuningdek, moddiy rag‘batlantirish tizimi va ijtimoiy himoyaga muhtoj talabalarni qo‘llab-quvvatlash borasida olib borilayotgan ishlar haqida atroflicha to‘xtalib o‘tdilar.
Universitetning 1-kurs magistrantlari Nigina Najmiddinova, Komila Raximova hamda 1-kurs talabalari Shaxribonu Yo‘ldashboyeva, Og‘abek Shodiyev va Ismoil To‘ychiyevlar Toshkent Davlat Sharqshunoslik Universitetdagi ta’lim sifati, talabalar uchun yaratilgan qulay shart-sharoitlar hamda o‘zlarining ta’lim yo‘nalishlari bo‘yicha chuqur bilim olish imkoniyatlari haqida ijobiy fikr bildirar ekan, mazkur oliygohda sharqshunoslik va xalqaro sohalarga oid zamonaviy bilimlar berilishi, ilmiy va amaliy tajriba orttirish uchun keng imkoniyatlar mavjudligini alohida ta’kidladilar.
Ijtimoiy tarmoqlar:
