HELVON UNIVERSITETI VA TDSHU TALABALARI ALMASHUVI BOSHLANADI
2023- yilning 4- fevral kuni Toshkent davlat sharqshunoslik universiteti rektori Gulchehra Rixsiyeva boshchiligidagi delegasiya Misr Arab Respublikasining Helvon universitetiga tashrif buyurdi va ikki universitet o‘rtasida o‘zaro hamkorlikni rivojlantirish borasida muzokaralar o‘tkazdi.
Muzokaralar chog‘ida TDSHU va Helvon universiteti o‘rtasida talabalar almashinuvi dasturini ishlab chiqish va o‘zaro muvofiqlashtirish, hamkorlikda qo‘shma ilmiy-innovatsion loyihalarni amalga oshirish, har ikki universitet professor-o‘qituvchilarining ilmiy tadqiqot natijalarini birgalikda e’lon qilish borasida fikr almashildi. Uchrashuv so‘ngida arab tilini o‘rganishga bo‘lgan ehtiyojning ortishi, sifatli ta’limni ta’minlashga qaratilgan, ayniqsa, bugungi kun talablaridan kelib chiqqan holda TDSHU va Helvon o‘rtasida Anglashuv memorandumi imzolandi. Shuningdek, o‘zaro hamkorlik qilish chora tadbirlarini o‘z ichiga oluvchi “Yo‘l xaritasi”ni ishlab chiqish to‘g‘risida kelishib olindi.
Endilikda arabshunos talabalar Helvon universitetiga qisqa muddatli – 1 semestrlik va 1 o‘quv yiliga o‘qishga borishlari mumkin bo‘ladi.
Eslatib o‘tamiz, 2022- yilning iyul oyida TDSHUning 7 nafar talabasi MARning aynan mazkur nufuzli universitetda amaliyot o‘tkazgan edi. TDSHU rektori talabalarimizni mamnun bo‘lib qaytganlarini ta’kidlab, juda foydali dasturlarni tashkil etib berganliklari uchun minnatdorchilik bildirdi.
Ijtimoiy tarmoqlar:
