QURBON HAYITI MUNOSABATI BILAN QUTLOV!
Assalomu alaykum, universitetimizning muhtaram profesor-o‘qituvchilari va qadrdon talabalari!
Sizlarni ezgu qadriyatlarimizning, muqaddas dinimizning asosiy bayrami, mehru oqibat, bag‘rikenglik, saxovat ayyomi – Qurbon hayiti bilan chin qalbimdan qutlayman.
Ko‘ngilga yaqin aziz ustozlar va tolibi ilmlar! Joriy o‘quv yilining ikkinchi yarim yilidan boshlab Sizlarning ta’lim berishingiz va ta’lim olishingiz cheklangan vaziyatga – pandemiya sharoitiga to‘g‘ri keldi. Shunday murakkab sharoit bo‘lishiga qaramasdan o‘ziga xos kechgan o‘quv yilini munosib yakunlab oldik. Buning uchun Siz azizlarga o‘z tashakkurlarimni yo‘llayman!
Biz – sharqshunoslar nihoyatda yaxshi biladigan muhim bir falsafa bor: Safarlar ichida eng ulug‘ safar bu bilim olishga, o‘qish va izlanishga yo‘naltirilgan safardir. Milliy va diniy qadriyatlarimizga ko‘ra Sizning ta’lim yo‘lidagi safaringiz katta bir ibodatga tenglashtiriladi. Mana shu ulug‘ safaringiz yo‘lidagi sa’y-harakatlaringizga ushbu ulug‘ kunlarda muvaffaqiyatlar, barokotlar tilab qolaman.
Aziz talabalar! Hamisha yodingizda bo‘lsin! Siz eng ilg‘or, mamlakatimiz manfaatiga yaraydigan, eng zamonaviy bilimlarni, ko‘nikmalarni egallashingizni yurtimiz, mahalla-kuy, ota-onangiz ko‘z tikib turibdi. Shu jihatdan bugungi voqeliklarni to‘g‘ri qabul etib, doimo ustozlaringiz, boboyu buvingiz, ota-onangiz aytayotgan so‘zlarni quloqqa oling. Muborak kunlarda ularning qutlug‘ so‘ziyu duosini olish ilinjida bo‘ling. Ularga mustaqil ishlay olishingizni, fanlarni masofadan turib, tinmay o‘qiy olishingizni, o‘zlashtirishingiz mumkinligi ko‘rsating. Shunda, biz – ustozlaringiz ham, ota-onangiz, yaqinlaringiz ham Sizning haqiqatdan ham qutlug‘ O‘zbekiston zaminining farzandi va mamlakatimiz ziyolisining yosh va ilg‘or vakili ekanligingizni ich-ichimizdan his etamiz.
Qadrdon ustozlar, hurmatli talaba-yoshlar! Taassufki, yurtimizda pandemiya yanada ko‘proq tarqalmoqda. Bu dard jamoamizning ayrim ustozlari va talabalarini ham chetlab o‘tmadi. Bugungi muborak kunlarda ularga Tangri taoladan tezda sog‘ayib, safimizga qaytishlarini, shuningdek, jamoamizdan bevaqt vafot etgan piru ustozlar, ularning yaqinlarini duoyu ibodatlaringizda qutlug‘ so‘zlaringiz bilan yod etasiz degan, umiddamiz.
Hozirgi sinovli davrlarni ijobiy yo‘nalishga solish va ushbu vaziyatdan yangi bilimlarni egallab chiqish, Siz azizlarning o‘z qo‘lingizda. Biz Sizlarga ishonamiz! Aminmizki, bugungi qiyinchiliklarga qaramasdan yangi bilimlarni o‘zlashtirgan holda, kuchli bo‘lib chiqasiz!
Siz azizlarni yana bir bor Qurbon hayiti bayrami bilan tabriklayman. Sizlarga tani sog‘liq, o‘tkir aqlu idrok, farovonlik hamda ko‘p yillar birgalikda, tugallikda ishlab, ta’lim yo‘lidagi xayrli ishlarimizni natijasini ko‘rib yurishni tilab qolaman!
Toshkent davlat sharqshunoslik universiteti rektori
Gulchehra Rixsiyeva
Ijtimoiy tarmoqlar:
Matnda xatolikni ko‘rsangiz, uni belgilab Ctrl+Enter ni bosing.
