Suyima G‘aniyeva xotirasiga bag‘ishlangan anʼanaviy “Navoiyshunoslar” VII Respublika ilmiy-amaliy anjumani
O‘ZBEKISTON RESPUBLIKASI OLIY TAʼLIM, FAN VA INNOVATSIYALAR VAZIRLIGI
TOSHKENT DAVLAT SHARQSHUNOSLIK UNIVERSITETI
O‘ZBEKISTON RESPUBLIKASI FANLAR AKADEMIYASI ABU RAYHON BERUNIY NOMIDAGI SHARQSHUNOSLIK INSTITUTI
O‘zbekiston qahramoni Suyima G‘aniyeva xotirasiga bag‘ishlangan anʼanaviy
“Navoiyshunoslar” VII Respublika ilmiy-amaliy anjumanining
AXBOROT XATI
O‘zbek navoiyshunosligining betakror tadqiqotchisi Suyima G‘aniyevaning serqirra ilmiy faoliyati yetishib kelayotgan avlodga o‘rnak bo‘lgudek. U bir tomondan Navoiy asarlari matnini ilmiy muomalaga kirituvchi va ularning nashrida ishtirok etuvchi zabardast matnshunos, boshqa tomondan turli nashrlarda Navoiy asarlarida yod etilgan kitoblar va shaxslar to‘g‘risidagi maʼlumotlarni keng sharhlovchi manbashunos, yana bir tomondan Navoiy asarlari ko‘pjildligida shoir asarlarining rus tilidagi tarjimoni sifatida gavdalanadi.
Professor Suyima G‘aniyeva uzoq yillar davomida pedagogik faoliyat bilan shug‘ullanib, yuzlab talaba yoshlar u kishining mumtoz adabiyotimiz tarixi va Navoiyning ijodiyotiga bag‘ishlangan maroqli maʼruzalarini tinglab soha mutaxassislariga aylangan. Olima adabiyotshunoslik, matnshunoslik va tarjimachilik sohasida yaratgan 80 ga yaqin kitob va risolalar, 900 dan ortiq ilmiy maqolalar muallifi hisoblanadi.
Hozirda jamiyatda kechayotgan tub o‘zgarishlar, maʼnaviy tiklanishlar davrida katta avlod olimlar ishini davom ettirish, ilmda vorisiylik qadriyatlarini taʼminlash muhim ahamiyat kasb etadi. Ayni masalalar eʼtiborga olinib, Toshkent davlat sharqshunoslik universiteti va O‘zR FA Sharqshunoslik instituti hamkorligida O‘zbekiston qahramoni, Beruniy nomidagi Davlat mukofoti sovrindori, professor Suyima G‘aniyeva xotirasiga bag‘ishlangan anʼanaviy “Navoiyshunoslar” anjumanini o‘tkazish rejalashtirilgan.
Navbatdagi ilmiy-amaliy anjuman 2026–yil 7–may kuni o‘tkaziladi.
Alisher Navoiy ijodiy merosiga, Suyima G‘aniva va unga zamondosh olimlarning ilmiy asarlariga bugunning yoshlari ko‘zi bilan qarash yangi ilmiy mulohazalar, yondashuvlar asosida tahlil va targ‘ib etish anjumanning bosh maqsadidir.
Ushbu anjuman yoshlarning, yosh sharqshunoslarning, ilm-u toliblarning bahs-u munozara maydoni sifatida o‘zbek navoiyshunosligining yosh avlodi qaysi ilmiy yo‘ldan ketadi, ular Navoiy asarlarini qaysi mezonlar asosida o‘rganadi, ularga Navoiy asarlarining qay jihatlari muhim singari so‘roq va jumboqlarga yechim topish ushbu anjumanning vazifasini ifodalaydi.
Ilmiy-amaliy anjumanda quyidagi masalalar muhokamaga tortiladi:
- Alisher Navoiy ijodiy merosi yoshlar talqinida;
- Alisher Navoiy ijodini ommalashtirishda zamonaviy texnologiyalarning o‘rni;
- Navoiy asarlari poetikasi;
- Navoiy asarlarining matnshunoslik va manbashunoslik yo‘nalishlarida o‘rganilishi;
- Navoiy asarlarining til va uslub xususiyatlari;
- Navoiy anʼanalarining Sharq adabiyotida davom etishi;
- Alisher Navoiy asarlarining yangi ilmiy nashrlarini amalga oshirish;
- Suyima G‘aniyeva – navoiyshunos.
- XX asr olimlarining navoiyshunoslik faniga qo‘shgan hissasi.
Anjuman materiallarini to‘plam holida chop ettirish rejalashtirilgan. Maqolalardagi ilmiy faktlarning to‘g‘riligi uchun muallif masʼuldir. Anjuman talablariga to‘g‘ri kelmagan maqolalar to‘plamga kiritilmaydi.
Maqola matni tahrir qilingan holda A-4 o‘lchovida, yuqoridan va pastdan 2 sm, chapdan 3 sm, o‘ngdan 1.5 sm joy qoldirib rasmiylashtiriladi. Maqolaning sarlavhasidan keyin bir qator tashlab, keyingi qatordan muallifning familiyasi, ismi va otasining ismi yoziladi. Yangi qatordan esa maqola muallifi o‘qiyotgan yoki ishlaydigan tashkilot nomi, lavozimi va muallifning elektron manzili ko‘rsatiladi. So‘ngra 1 interval qoldirilib, yangi qatordan 1,5 intervalli qatorlarda maqola matni 5-8 betgacha hajmda yoziladi. Matnning elektron nusxasi MS Word dasturida, Times New Roman shriftida, 14 kegel kattaligida bo‘lishi lozim. Mazkur talablarga javob bermagan maqolalar nashrga tavsiya etilmaydi.
Anjumanda qatnashish uchun maqolani elektron ko‘rinishda 2026-yil 25-aprelga qadar faqat (yoshnavoiyshunos@gmail.com) pochta manzili orqali yuborish so‘raladi.
Tashkiliy qo‘mita: Toshkent shahri, Amir Temur ko‘chasi, 20-uy. Toshkent davlat sharqshunoslik universiteti Turkshunoslik Universiteti Turkshunoslik oliy maktabi 611-xona; Toshkent shahri, Mirzo Ulug‘bek tumani, Mirzo Ulug‘bek ko‘chasi 79-uy. O‘zbekiston Respublikasi Fanlar Akademiyasi Abu Rayhon Beruniy nomidagi Sharqshunoslik instituti Sharq mumtoz adabiyoti bo‘limi, 203-xona.
Elektron pochta manzili: yoshnavoiyshunos@gmail.com Tel.: (91) 506 29 36 (Oysara Madaliyeva)
+998900329822 (Dustkarayeva Surayyo)
Ijtimoiy tarmoqlar:
