TDSHUda “ZAHIRIDDIN MUHAMMAD BOBUR MEROSI SHARQSHUNOSLAR TALQINIDA” nomli ilmiy-ma’rifiy tadbir bo‘lib o‘tdi
Zahiriddin Muhammad Bobur tavalludining 541 yilligi munosabati bilan Toshkent davlat sharqshunoslik universitetida “ZAHIRIDDIN MUHAMMAD BOBUR MEROSI SHARQSHUNOSLAR TALQINIDA” nomli ilmiy-ma’rifiy tadbir bo‘lib o‘tdi.
2024- yil 16- fevral kuni Toshkent davlat sharqshunoslik universitetida Zahiriddin Muhammad Bobur tavalludining 541 yilligi munosabati bilan «Zahiriddin Muhammad Bobur merosi sharqshunoslar talqinida» nomli ilmiy-ma’rifiy tadbiri bo‘lib o‘tdi. Tadbir universitetda «Zahiriddin Muhammad Bobur merosini o’rganish markazi» va «Bobur nomidagi xalqaro mukofot sohibi», sharqshunos, boburshunos olim, professor Ansoriddin Ibrohimov nomidagi o‘quv xonasi»ning ochilish marosimi bilan boshlandi.
Tadbirda O’zbekiston Respublikasi Prezidentining maslahatchisi – Spichrayter, taniqli yozuvchi Xayriddin Sultonov, Bobur xalqaro jamoat fondi raisi Zokirjon Mashrabov, sharqshunos hamda boburshunos olimlar, soha mutaxassislari ishtirok etdilar. Tadbir doirasida Ansoriddin Ibrohimovning «Boburiylar merosi», «Boburnoma- buyuk asar» kabi kitoblarning taqdimoti bo‘lib o‘tdi.
Shuningdek, tadbir doirasida Temuriylar tarixi davlat muzeyi katta ilmiy xodimi t.f.d., prof. Abdumajid Madraimov va Toshkent davlat sharqshunoslik universiteti dotsenti, PhD. Askariy Madraimov hammuallifligidagi “Buyuk shoir va olimning ajoyib taqdiri, g‘oroyib sarguzashtlari va ibratli hayoti” monografiyasining taqdimoti bo‘lib o‘tdi. Ushbu monografiyada Temuriylar Renessansi yorqin siymolaridan biri Zahiriddin Muhammad Boburning buyuk shoir va olim sifatidagi ajoyib va g‘aroyib xayoti, faoliyati va ijodi ommabop tarzda bayon etilgan. Zahiriddin Muhammad Boburning “Vaqoyi” asari va uning tarix ilmi rivojiga qo‘shgan hissasi keng bayon etilgan. “Vaqoyi” asari qo‘lyozmalariga ishlangan rasmlar Boburiylar davri miniatyura san’atining noyob namunalari ekanligi, bu asar san’at taraqqiyotiga katta ta’sir o‘tkazgani hamda Alisher Navoiyning “Xamsa” dostonlari, buyuk xattot Sulton Ali Mashhadiy bitgan “Tanlangan Devon” va “Majolis un-nafois” asarlariga Boburiylar rassomlari yaratgan nafis mo‘’jaz rasmlar matn bilan qiyosiy o‘rganilgan.
Online muloqot tarzida tashkil etilgan mazkur ilmiy-ma’rifiy tadbirda xorijlik boburshunos olimlar – Shafiqa Yorqin (Shvetsiya), Hasan Beg (Buyuk Britaniya), Shahid Taslim (Jamiya Milliya Islamiya universiteti, Hindiston) Mehbub Hussayn (Panjob universiteti, Pokiston) o‘z ma’ruzalari chiqish qildilar.
Tadbir universitet talabalari tomonidan o‘qilgan sharq va g’arb tillaridagi Zahiriddin Muhammad Bobur ijodi namunalari hamda O’zbekiston konservatoriyasi xonandalari ijrosidagi Bobur g’azaliga bastalagan kuy-qo‘shilar bilan davom etdi.
Ijtimoiy tarmoqlar:
