Shanhay hamkorlik tashkiloti doirasidagi integratsion jarayonlarda yangi impuls
2020-yil 22-dekabr kuni “ShHT makonida integratsiya jarayonlarini rivojlantirish uchun yangi turtki” mavzusida xalqaro onlayn davra suhbati bo‘lib o‘tdi.
Davra suhbati Sharq mamlakatlarini o‘rganishda asosiy tadqiqot va o‘qitish markazi bo‘lgan Toshkent davlat sharqshunoslik universiteti tomonidan tashkil etildi.
Unda O‘zbekiston parlamenti a’zolari, yetakchi mahalliy va xorijiy ekspertlar, O‘zbekiston Respublikasi Prezidenti huzuridagi Strategik va mintaqalararo tadqiqotlar instituti, ShHTning O‘zbekistondagi Xalq diplomatiyasi markazi, Xalqaro munosabatlar axborot-tahlil markazi xodimlari, shuningdek mahalliy va xorijiy oliy o‘quv yurtlari olimlari hamda o‘qituvchilari ishtirok etdilar.
Tadbirda Oliy Majlis Senati Raisining birinchi o‘rinbosari S. Safoyev ishtirok etdi va so‘zga chiqdi. Uning ta’kidlashicha, Shanxay hamkorlik tashkiloti paydo bo‘lishi mamlakatlarimiz o‘rtasida barqaror hamkorlik mexanizmlarini va doimiy siyosiy muloqot maydonini yaratishga bo‘lgan intilish bilan izohlanadi. Boshqacha aytganda, ShHT ulkan mintaqada yashovchi xalqlarning hozirgi zamon tahdidlariga birgalikdagi javobi bo‘ldi va hozir ham shunday.
Mintaqada tinchlik va barqarorlikni mustahkamlash masalalari ShHT kun tartibidagi ustuvor vazifa hisoblanadi. O‘zbekiston Prezidenti Sh.M.Mirziyoyev Tashkilotning so‘nggi sammitidagi nutqida mintaqada ziddiyatli hududlar hali ham saqlanib qolganini ta’kidlagan edi.
Boshidanoq ShHTni real harakat tashkilotiga aylantirish intilishi paydo bo‘lgan edi. ShHT o‘z faoliyatida barqaror iqtisodiy rivojlanishsiz, ijtimoiy va iqtisodiy muammolarni hal etmay turib, mustahkam barqarorlik va xavfsizlikka erishish mumkin emasligini tushunib yetdi.
Mintaqaviy iqtisodiy hamkorlikni chuqurlashtirish uchun shart-sharoitlar yaratish ushbu Tashkilotning kun tartibida tobora ko‘proq o‘rin egallamoqda. Mintaqa miqyosida yirik loyihalarni amalga oshirish uchun tashkiliy, huquqiy va moliyaviy imkoniyatlar bosqichma-bosqich shakllantirilmoqda.
Markaziy Osiyoni eng yirik dengiz portlari va jahon bozorlari bilan bog‘laydigan yuqori talabga ega transport loyihalarini amalda ro‘yobga chiqarish ShHTning eng muhim ustuvor yo‘nalishi hisoblanadi.
Shunday qilib, ShHT tobora mintaqani rivojlantiruvchi tashkilotga aylanib bormoqda.
Tashkilot oldida turgan vazifalarni muvaffaqiyatli bajarishning asosiy kafolati – hamkorlar o‘rtasida o‘zaro ishonchni mustahkamlash, printsiplar o‘xshashligini, asosiy muammolarga bir xil yondashishni ta’minlashdir. Bunda ShHTga a’zo davlatlarning parlamentlararo hamkorligini rivojlantirish muhim rol o‘ynashi mumkin va o‘ynashi kerak, deb ta’kidladi Oliy Majlis Senati Raisining birinchi o‘rinbosari S. Safoyev.
Davra suhbati doirasida Markaziy va Janubiy Osiyoning mintaqaviy o‘zaro bog‘liqligini rivojlantirish nuqtai nazaridan ShHT doirasida hamkorlikni, shu jumladan ko‘p tomonlama madaniy va xalq diplomatiyasini, davlatlararo munosabatlarni chuqurlashtirish, xavfsizlikni ta’minlash istiqbollari, shuningdek giyohvandlikka qarshi kurashish va boshqa sohalarda hamkorlik qilish mavzulari ko‘rib chiqildi.
Ijtimoiy tarmoqlar:
