Sanoat korxonasida tanishtiruv ekskursiyasi (SDG 8 – Munosib mehnat va iqtisodiy o‘sish)
O‘zbekiston Respublikasi Investitsiyalar, sanoat va savdo vazirligi bilan hamkorlikda Toshkent davlat sharqshunoslik universiteti talabalari uchun yetakchi sanoat korxonasida tanishtiruv ekskursiyasi tashkil etildi. Mazkur tashabbus BMTning Barqaror rivojlanish maqsadlari doirasida, xususan SDG 8 – munosib mehnat sharoitlarini ta’minlash, yoshlar bandligini oshirish hamda barqaror iqtisodiy o‘sishni qo‘llab-quvvatlash maqsadlariga xizmat qiladi.
Tadbir Toshkent shahrida joylashgan “Bakan Tex” korxonasida o‘tkazilib, talabalarga sanoat ishlab chiqarish jarayonlarini real sharoitda kuzatish imkoniyati yaratildi. Ekskursiya davomida ishlab chiqarishning asosiy bosqichlari, zamonaviy texnologik jarayonlar, mehnat xavfsizligi standartlari, mahsulot sifatini nazorat qilish tizimi hamda korxonaning boshqaruv mexanizmlari haqida batafsil ma’lumotlar berildi.
Talabalar ishlab chiqarish sexlarida amaliy jarayonlarni bevosita kuzatib, sanoat korxonalarida mehnatni tashkil etish, samaradorlikni oshirish va innovatsion texnologiyalarni joriy etishning ahamiyatini chuqurroq anglab yetdilar. Bu esa ularning kelajakdagi kasbiy kompetensiyalarini rivojlantirishga xizmat qildi.
Tadbir yakunida korxona mutaxassislari tomonidan eksportga yo‘naltirilgan mahsulotlar, innovatsion ishlab chiqarish yo‘nalishlari hamda yangi ish o‘rinlarini yaratish bo‘yicha olib borilayotgan ishlar taqdim etildi. Ushbu hamkorlik talabalarning amaliy bilimlarini mustahkamlash bilan birga, yoshlar bandligini oshirish va iqtisodiyotning sanoat sektorini rivojlantirishga hissa qo‘shishi ta’kidlandi.
Ijtimoiy tarmoqlar:
