Navro‘z nafasi va milliy qadriyatlar uyg‘unligi: TDSHUda bayram shukuhi
2026-yil 21-mart kuni Toshkent davlat sharqshunoslik universitetida “Navro‘zni ulug‘lash – insonni ulug‘lashdir!” shiori ostida 21-mart – Navro‘z umumxalq bayramiga bag‘ishlangan madaniy-ma’rifiy bayram tadbiri bo‘lib o‘tdi.
Tadbirni universitet rektori Gulchehra Rixsiyeva kirish so‘zi bilan ochib berib, barchani bahor va yangilanish ramzi bo‘lgan Navro‘z bayrami bilan tabrikladi hamda ushbu qadimiy bayram xalqimizning milliy qadriyatlari, urf-odatlari va birdamlik timsoli ekanini ta’kidladi.
Bayram dasturi doirasida universitetda o‘tkazilgan turli tanlovlarda g‘olib bo‘lgan iqtidorli talabalar taqdirlandi. Shuningdek, tadbir davomida talaba-yoshlar hamda san’atkorlar tomonidan kuy-qo‘shiqlar, milliy raqslar, she’rlar va folklor chiqishlari namoyish etildi. Shuningdek, viloyatlar kesimida bezatilgan dasturxonlar namoyish etildi.
Xususan, Oybek Tillayev boshchiligidagi “Oybek” doira guruhi, universitetning “Sharq navolari” xor jamoasi hamda “Sanduvoch” ansambli ijrosidagi musiqiy chiqishlar bayramga alohida ko‘tarinkilik bag‘ishladi. Amaliy fanlar fakulteti talaba qizlari tomonidan namoyish etilgan “Kelinsalom” marosimi esa milliy an’analarimizning go‘zalligini aks ettirdi.
Tadbir davomida O‘zbekiston xalq hofizi Orolmirzo Safarov, shuningdek, estrada xonandasi Masrur Usmonov hamda boshqa ijodkorlar tomonidan ijro etilgan kuy-qo‘shiqlar, baxshilar termalari va shoirlar tomonidan o‘qilgan she’rlar yig‘ilganlarga bayramona kayfiyat ulashdi.
Talaba-yoshlar tomonidan ijro etilgan milliy raqslar, dutor sadolari va turli badiiy chiqishlar Navro‘z bayramining ruhini yanada yuksaltirdi.
Mazkur tadbir universitet jamoasi va talaba-yoshlar uchun unutilmas bayramona lahzalarni taqdim etib, milliy qadriyatlarimizni ulug‘lash, yoshlar qalbida vatanparvarlik va milliy an’analarga hurmat tuyg‘ularini mustahkamlashga xizmat qildi.
Ijtimoiy tarmoqlar:
